ប្រធានអង្គការសម្ព័ន្ធភាពការពារសិទ្ធិមនុស្សកម្ពុជាលោក រស់ សុដ្ឋា បានប្រាប់វិទ្យុអាស៊ីសេរីថា ក្រុមអង្គការ សមាគម និងសហជីពចំនួន១០៦ស្ថាប័ន បានគាំទ្រការដាក់ញត្តិទៅបណ្ដាប្រទេសហត្ថលេខីកិច្ចព្រមព្រៀងសន្ដិភាពទីក្រុងប៉ារីស។
លោកបានបន្តថា នៅថ្ងៃទី២០ ខែសីហា ញត្តិបានដាក់ទៅដល់ស្ថាប័ននិងស្ថានទូតចំនួន១០ប្រទេស រួមមានស្ថានទូតបារាំង (France) អង់គ្លេស (England) អាល្លីម៉ង់ (Germany) សហរដ្ឋអាមេរិក (USA) ចិន (China) ឥណ្ឌា (India) អូស្ដ្រាលី(Australia) ឥណ្ឌូនេស៊ី (Indonesia) សិង្ហបុរី (Singapore) និងទីស្ដីការគណៈរដ្ឋមន្ត្រី ហើយនឹងបន្តដាក់ទៅប្រទេសចំនួន៩ទៀត រួមមានស្ថានទូតប្រទេសថៃ (Thailand) វៀតណាម (Vietnam) ឡាវ (Loa) ម៉ាឡេស៊ី (Malaysia) និងជប៉ុន (Japan) ជាដើម រួមទាំងអង្គការសហប្រជាជាតិ នៅថ្ងៃទី ២១ ខែសីហា។
គ្រប់ស្ថានទូតទាំងអស់បានសន្យាថា បន្តយកបញ្ហានេះ និងបញ្ជូនសាររបស់យើងគឺញត្តិនេះ ទៅតំណាងឱ្យប្រទេស គឺមាននាយករដ្ឋមន្ត្រី ប្រធានាធិបតីនិងព្រះមហាក្សត្រនៃសមាជិកហត្ថលេខីកិច្ចព្រមព្រៀងសន្ដិភាពក្រុងប៉ារីស ដើម្បីលោកពិចារណាលើសេចក្ដីស្នើរបស់ពួកយើង។
— លោក រស់ សុដ្ឋា
សេចក្ដីប្រកាសព័ត៌មានរបស់ក្រុមអង្គការសង្គមស៊ីវិលបានលើកឡើងថា ការប៉ះទង្គិចគ្នាដោយអាវុធបង្កឡើងដោយយោធាថៃ កាលពីពេលថ្មីៗនេះ បានធ្វើឱ្យមនុស្សស្លាប់និងរបួសជាច្រើននាក់ បង្ខំឱ្យមនុស្សរាប់ម៉ឺននាក់ភៀសខ្លួន សាលារៀនបិទទ្វារ និងប៉ះពាល់តំបន់បេតិកភណ្ឌវប្បធម៌ ដែលជាទង្វើបំពានច្បាប់អន្តរជាតិ និងគំរាមកំហែងដល់ស្ថិរភាពនិងសន្ដិភាពក្នុងតំបន់។
មាត្រា៥ នៃកិច្ចព្រមព្រៀងសន្ដិភាពក្រុងប៉ារីសចែងថា ក្នុងករណីមានការរំលោភ ឬការគំរាមកំហែងរំលោភលើអធិបតេយ្យភាព ឯករាជ្យ បូរណភាព និងការមិនអាចរំលោភបាននៃដែនដីនៃកម្ពុជា បណ្ដាភាគីក្នុងកិច្ចព្រមព្រៀងទាំងនេះ ត្រូវពិគ្រោះជាបន្ទាន់ ដើម្បីអនុម័តរាល់វិធានការសមស្រប ដើម្បីធានាការគោរពដល់ការប្ដេជ្ញាចិត្តទាំងនេះ និងដោះស្រាយរាល់ការរំលោភទាំងនោះតាមមធ្យោបាយសន្តិវិធី។
ការដាក់ញត្តិរបស់អង្គការសង្គមស៊ីវិលទាំងនេះ បានធ្វើឡើងបន្ទាប់ពីរដ្ឋាភិបាលកម្ពុជាបានដាក់លិខិតទៅអង្គការសហប្រជាជាតិកាលពីថ្ងៃទី ១១ ខែសីហាថា កិច្ចព្រមព្រៀងឈប់បាញ់កម្ពុជា-ថៃ កំពុងស្ថិតក្នុងភាពផុយស្រួយធ្ងន់ធ្ងរ បន្ទាប់ពីទាហានថៃបន្តរំលោភចូលដែនអធិបតេយ្យភាព និងបូរណភាពទឹកដីកម្ពុជាដោយដាក់ពង្រាយកម្លាំងបន្ថែម និងបញ្ជូនគ្រឿងចក្រឈូសឆាយធ្វើផ្លូវ ជីកលេណដ្ឋាន រាយបន្លាលួស និងរុះរើផ្ទះសម្បែងពលរដ្ឋខ្មែរជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។